दापोली (रत्नागिरी) : दापोलीच्या डॉ. बाळासाहेब सावंत कोकण कृषी विद्यापीठातील ३० कर्मचारी २८ जुलैला आंबेनळी घाटात झालेल्या भीषण अपघातात बळी पडले. या दुर्दैवी घटनेत मृत्यू झालेल्या कर्मचाऱ्यांच्या कुटुंबीयांना आर्थिक मदत देणे सोयीचे व्हावे, यासाठी विद्यापीठाच्या वतीने ‘स्टेट बँक ऑफ इंडिया’च्या दापोली शाखेत खाते उघडण्यात आले आहे.
विद्यापीठाच्या अनेक माजी विद्यार्थ्यांसह इतरही बऱ्याच जणांनी या कुटुंबांना आर्थिक मदत करण्याची इच्छा विद्यापीठाकडे व्यक्त केली होती. या सर्वांना मदतीचा निधी पाठविणे सोयीचे व्हावे, यासाठी विद्यापीठाच्या वतीने हे खाते उघडण्यात आले आहे. मृतांच्या कुटुंबीयांसाठी लवकरात लवकर मदतनिधी उभा राहण्यासाठी तातडीने हे खाते उघडण्यात आले आहे. बँक खात्याचे तपशील बातमीच्या शेवटी दिले आहेत.
दरम्यान, या अपघातात मृत्युमुखी पडलेल्या विद्यापीठ कर्मचाऱ्यांच्या कुटुंबीयांना मुख्यमंत्री सहायता निधीतून प्रत्येकी चार लाख रुपयांची मदत करण्यात आली आहे. तसेच रत्नागिरी जिल्ह्याचे पालकमंत्री रवींद्र वायकर यांनीही प्रत्येकी दहा हजार रुपयांची मदत केली आहे. विद्यापीठातील प्राध्यापक संघटनेची बैठक नुकतीच झाली. सर्व प्राध्यापकांनी आपले एक दिवसाचे वेतन या मृतांच्या कुटुंबीयांना देण्याचे त्या बैठकीत ठरवण्यात आले. तसेच विद्यापीठातील अन्य कर्मचारीही आपले एक दिवसाचे वेतन मदत म्हणून देणार आहेत.
मदतनिधी पाठविण्यासाठी बँकेचा तपशील
स्टेट बँक ऑफ इंडिया, शाखा दापोली, जि. रत्नागिरी
खाते क्रमांक : ३७८४३०७७६२९
IFSC : SBIN0001047
